الطوفان
كلمات الشاعر : حسين أبوبكر المحضار
من دخل في بحر مابلد وقايس شله الطوفان
الهوى يخرب مصانع ... عالية والجبر يبنيها
يامحب قلبي تراجع ... رد نفسك من مهاويها
والهيانة لاتجي فيها قبل ماتهتان
من دخل في بحر مابلد وقايس شله الطوفان
من زمن حاسبك نافع ... لاتعكت باتبتيها
ماحسبتك باتتابع ... بعض شي واشياء تخليها
تنكر الجوده وتنسيها والزمن لي كان
من دخل في بحر مابلد وقايس شله الطوفان
اصبح المعروف ضايع ... والكلم ماحد يوفيها
والاماين والودايع ... لاهلها ماحد يوديها
هكذا الايام تاليها من تامن خان
من دخل في بحر مابلد وقايس شله الطوفان
ماتجي عينه الاصابع ... ما استوت لو باتسويها
وانت شف عادك وطالع ... خذ من الكلمه معانيها
بعض وقتك بايكفيها لانته صدق انسان
من دخل في بحر مابلد وقايس شله الطوفان
بدل الوقت الطبايع ... والبصائر كاد يعميها
من سمع كلمه تصاقع ... او سكت ماطاع يحكيها
الشهادة حد يخفيها ضعف في الايمان
من دخل في بحر مابلد وقايس شله الطوفان
ليست هناك تعليقات:
إرسال تعليق